Гӏалгӏай мехка чаккхе йир «Са да-нана полице болх беш да» яхача яхьа
Гӏалгӏайче гӏолла йолча Россе МВД белгалбир «Са да-нана полице болх беш да» яхача Ерригроссийски суртий яхьан моттигерча бӏале котбаьннараш. Из кхоллама проект хӏара шера дӏахьош я Россе МВД чуйоагӏача Юкъарлон советаца цхьана. Карарча шера, шоай цу темах болх гойтар тайп-тайпарча боахама доакъоша, моттигерча МВД гӏулакха викалаша, 6-14 шу даьннача бераша. Укх шера дӏахьош йола яхь, Россе цхьоагӏон Шу хилара хетаяь яр.
«Балха мах оттабеш бар лоархӏаш бола говзанчаш. Жюре чубоагӏаш бар Гӏалгӏай Республике гӏолла йолча, МВД чуйоагӏача Юкъарлон совета викалаш, иштта боахама ветеранаш, болхлой. Цига белгалдир дикагӏа, къаьга дилла сурт, тема йоаржаяр, хӏара хӏаман хьисап хилар. Жюре баьча балха кхаь даькъ тӏа котбаьннараш белгалбир. Шишина Мария котъяьлар 6-8 шераш долчарна юкъе, Султиганаькъан Амир хилар 9-11 шу даьннарашта юкъе дикагӏа сурт дилларех, хӏаьта ӏоахарганаькъан Алия котъяьлар 12-14 шу даьннарашта юкъе. Лаьрххӏа йола котало яьккхар Шишин Александра», - аьлар «Сердало» газетага цу боахама зарбан болх лелабераша.
Моттигерча МВД кулгалхоша къонача доакъашхошта ловца баьккхар, уж дас-нанас дӏахьош болча наькъ тӏа баха ловш долча дешашца.
Котало яьккхарий болх Россе МВД дӏабахьийтар. Цига Гӏалгӏайче гойтаргья, яхьа чаккхе еча хана, Ерригроссийски гойтам дӏахьош.
