Россе унахцӏенон Министерствон НМИЦ говзанчаша вай мехка бена никъ чакхбаларах дийцар кхетаче
Терапех, кхыча унахцӏенон оагӏонца дувзаденнарех болча федеральни Къаман унахцӏенон тохкама моттига говзанчаша вай мехка бенача наькъах, кхоачашдаьрех дувцаш кхетаче дӏайихьар. Вай республикерча лорашца цхьана болх дӏахьош, царна цхьаццадола кердадараш, шоай гӏулакхе накъадаргдараш довзийташ хилар уж.
«Мехкарча цхьаццайолча дарбанчешка баха хилар царна тӏахьожараш. Къаьстта терко еш дийцар гаьнара баьхкача хьаьшаша хьалхара лорий-санитарни гӏо дарах, бахархошта юкъерча диспансеризацех, иштта инфекционни лоархӏаш доаца лазараш ца даржийтара духьала лоаттабе безача балхах.
НМИЦ ТПМ говзанчаш вай мехкарча дарбанчешкара, поликлиникашкара хьал тохкаш; унахой тӏаийбар, царга хьажар, каьхаташцара болх малагӏча боараме латт хьожаш хилар. Иштта цар теркалдир дарбанчешка, поликлиникашка эшаш дола гӏирсаш; хиланза баргбоаца кхоачам болаш бий», - йоах «Сердалога» цу оагӏонцарча министерствон болхлошкара кхаьчача хоамо.
Унахцӏенон гӏулакхех йолча Министерствон хьалха латтача ӏалбаканаькъан Зарас кулгал деш, мехкарча керттерча лорашца дӏайихьача кхетаче дийцар цу оагӏонцарча гӏулакхех. Федеральни моттигера кхаьчача говзанчаша дийцар поликлиникашкара болх боагӏача боараме тоабара тӏехьа юкъелаца, кхоачашде дезарех. Ӏалбаканаькъан Зарас, царна доккха баркал оалаш, белгалдир, теркалдаь кхоачамбоацараш меттадоаладара тӏехьа, цар хьалхадаьхараш хьаэцара тӏехьа болх дӏахьоргхилар. Из деррига керте лоацаш, поликлиникашкара болх дикагӏа тоабара тӏехьа къахьега лаьрхӏа ба унахцӏенон Министерстве.
