«Даьй наькъашка гӏолла…» яхача балхах дийцар мехка
Республике дийцар «Даьй наькъашка гӏолла: ханаца тохкам баь, доал дар» яхача шоллагӏча ӏилман балхах. Цу гӏулакха лаьрхӏа кхетаче дӏайихьар Мехкадаь, Паччахьалкхен Администрацена кулгал деча Мархенаькъан Анзора Президентски академе доакъашхошца, студенташца.
«Укх шерара болх маьцхали бетта 20-ча денгара 24-ча денга кхаччалца дӏахьош бар. Паччахьалкхен гӏулакха Института, Президентски академе студенташ бар доакъашхой. Республикан исторически тӏехьаленца дувзаденнараш тохкаш, йоккха программа йоаржайир цар кхаь дийнахьа. Лоархӏаме хилар цу оагӏонца Маьтлоама тӏа балар, гӏалгӏай къаман дагалоаттама, сийлен Мемориале бахар, Массаза йоагача цӏера юхе зизаш дахкар, Тхьаба-Ерд йолча кхачар. Иштта программан юкъе дар тайп-тайпара декхараш кхоачашдар, хьакимашцара кхетаче дӏаяхьар.
Исторически оагӏонца дувзаденнараш, культуран ӏадаташ, иштта тахан доаржадераш вӏаший бувзам болаш долга теркалдир студенташа», - йоах «Сердалога» мехкарча Паччахьалкхера бенача хоамо.
Мехкадаьгара грамоташ луш белгалбир цу балха тӏа дика къахьийгараш, белгалбаьннараш. Хоза тӏаэцарах, мехка кулгалхошта баркал оалаш бар студенташ. Академе студенташ дӏахойодача хана а, мехкарча кагирхой проекташта юкъебоалабеш, болх дӏабахьарах дийцар цига.
