Нана дарбанче ӏоюжаеш гӏо дир, мехка СВО доакъашхочунна
Тӏема операце доакъашхой, иштта цар цӏагӏарча наьха хьашташ кхоачашдеш ба тахан «Даьхен лорабой» яхача ганза мехкарча филиала къахьегамхой. Укх наькъа бӏухо волча Оздой Ахьмада нана дарбанче ӏоюжае гӏо дир цар. Цӏаьхха, цамогаш хинна Ӏалбаканаькъан Аьсет, ӏойижа ха йоаккхаш, дарба де дезача хьале эттаяр. Из кхетадаь филиала болхлой цу сахьате оарцагӏбаьлар цун гӏулакха.
«Филиала болхлочо Темархананаькъан Ӏийсас, ше тӏахьожам беш, да из гӏулакх. Илдарха-Гӏалий тӏарча администраце болхлой оарцагӏбаьхар цунна. Филиала болхлоша эшаш мел дола каьхаташ вӏаштӏехьадаьхар, СВО доакъашхочун нанна уллув хилар деррига чакхдаллалца. Карарча хана Илдарха-Гӏалий тӏарча дарбанчен терапе ӏоюжаяь дарба деш я из», - йоах «Сердалога» филиалера бенача хоамо.
Дӏахо а терко еш, Ӏалбаканаькъан Аьсета дарба деш волча лораца бувзаме болаш, хургба филиала болхлой. Меттаена из дарбанчера араяллалца, цун гӏулакхага хьожаш хургба филиала къахьегамхой.
