Куташ е гӏортарах, бехктокхаме озаргва мехкарча цхьан фирман гендиректор
Коммерчески фирман гендиректора духьала тохкама болх дӏахьош хилар мехкарча Тохкама комитета болхлой. УК РФ 3-ча даькъа 30-ча ст., 3-ча даькъа 159 ст. бехктокхаме озаш ва из ӏаьдало (доккхача ахчанца шозза тийшаболх бе гӏортар).
Тохкама болхлоша белгалдечох, оапаш бийца, ахча лочкъаде венна хиннав из, бакъда цхьацца бахьанех ше лаьрхӏар дӏачакхдаккха аьттув ца боалаш висав. «2023-ча шера наджгоанцой бетта, фирман керттера кулгалхо волаш, иштта бухгалтера декхараш кхоачашдеш волаш, йоал дӏачутелача моттиге 2020 шерарча 3-ча кварталах, 2021-ча шера 1-ча, 2-ча кварталех йолча йоалах нийса доаца каьхаташ чуденнад цо.
Чуденнача каьхаташка диллача, 1,5 млн йоалах дӏачутийнна ахча юха меттаоттаде дезаш хиннаб. Бакъда цу гӏулакхаца дувзаденнараш тахка эттача, йоалах болча оагӏон болхлошта гучадаьлар из деррига бух боацаш, тийшаболх кхостабе дагахьа вӏашагӏделла долга», - дийцар «Сердалога» мехкарча Тохкама комитете.
Цу сага гӏулакх тахан суде тохкаш латт. Мехкарча Россе МВД экономически оагӏонцарча кхерамзленах, кхааш ийдара духьала къовсам лоаттабарах болча оагӏонгара кхаьчача каьхаташка гӏолла хьадийллад ӏаьдало гӏулакх.
