Хин хьал тоадара тӏехьа, къахьегаш ба вай мехка
Бахархоша молаш дола хий цӏена хилийта гӏерташ, болх дӏахьош ба тахан мехка. Из хоам «Сердалога» бера Мехкадаь зарбан болх лелаберашкара.
«Хин хьал меттадоаладар тахан вайна хьалхашка латта керттера декхар да. Эзараш болча дезалий вахаре лоархӏаме оагӏув дӏалоацаш дола хӏама да из. Аз тӏахьожам лоаттабеш, чакхбоаккхаш ба тахан из болх, хӏара дийнахьа тохкаш да фу кхоачашдаьд, де дезаш дисараш малагӏаш да», - аьлар вай мехкадас Келаматанаькъан Махьмуд-ӏаьлас, цу оагӏонца дӏахьоча балхах дувцаш.
Мехка кулгалхочо белгалдир, тахан боккха болх дӏахьош латтилга - хьалъеш латт Эса тӏарча хих пайда эцаргбола моттиг. Цигара моттигаш шаьръеш, наькъаш дехкаш, иштта кхыдола балхаш кхоачашдеш хьинаре къахьегаш боахк тахан.
Беррига болх чакхбаьнна баьлча, вай шахьарашта, лохе а лакхе а ядача лоаман моттигашка хий лоаттадеш моттиг хургья цох. Эзараш болча наьха вахара хьал аттачахьа доаккхаргдола лоархӏаме гӏулакх да из.
