Лаьрхӏа хинначул шозза дукхагӏа, спорта майдаш хьаелларгья мехка
Спорта моттигаш хьаеллара болх дикка гаьнабоалаш латт укх шера. Юххьанца мехка бархӏ «хьаькъале» спорта майда хьаелла лаьрхӏа хиннабар, хӏаьта тахан 14-га кхоачаш дӏашербаьб из болх. РФ цу оагӏонцарча Министерствос хьаллоацаш, федеральни проекташка гӏолла дӏахьош мехка спорт йоаржаяра болх ба из. «Керда спорта моттигаш хургья Долакха-Юрта, Ӏаьлий-Юрта, Яндаре, Инаркъе, Мужеча, Юкъерча Ачалкхе, Магӏалбике, Наьсаре, Шолжа-Шахьаре. Футболах, баскетболах ловзарашта, иштта кхыйолча спорта эшаш мел бола кхоачам хургба цига. Вай мехка спорт йоаржаяра, ма хулла дукхагӏа кагирхой спорта юкъеозара тӏехьа чӏоагӏа лоархӏаме болх ба из. Берий, кагирхой, иштта боккхагӏбарий аьттув ба, шоаш бахача моттигера арабовла ца безаш, спортаца хӏара денна бувзам лоаттабе. Бахархошта доккха совгӏат да ала йиш йолаш болх ба из», - язду ший Телеграм-оагӏон тӏа вай мехкадас Келаматанаькъан Махьмуд-Ӏаьлас.
Республикан Кулгалхочо белгалдир, цу оагӏонцарча гӏулакхех ше РФ Президентаца Путин Владимирца хиннача кхетаче хьоахадаьлга. Наьсаре, Илдарха-Гӏалий тӏа, иштта Дошлакъий-Юрта, Тӏой-Юрта, Сурхо тӏа, Долакха-Юрта, Дабе-Юрта наьк де моттигаш йолаш керда ФОКаш эшилгах дийцар Мехкадас. Тахан 58% гаргга мехкахой спортаца бувзам лелабеш, шоай дегӏага хьожаш ба. 2030-ча шера 70%-га кхоачаш тоаденна хила деза из хьал, аьнна, Путин Владимира белгалдаьчунга кхоачаш латт ала йиш йолаш да вай. Цу оагӏонцара гӏулакхаш боаггӏача боараме хьаоттаде, спорта моттигаш таханарча ханага хьежжа тоаяь хила еза. «Демографи» яхача къаман проектага, паччахьалкхен программага гӏолла 2019-ча шергара 2025-ча шерга кхоачача юкъа, 20 йоккха спорта моттиг хьайийллай вай мехка.
