Пневматически оала герз берага леладайтар кхераме долга дувц мехка
Саькура бетта 15-ча дийнахьа 22.30 Магасерча МВД оагӏон болхлошка Наьсарерча ДРКБ хоам бир, басилгах пневматически оалача тепча пхо кхийтта 18 шерга кхачанза вола кӏаьнк ӏочувоалаваьв, аьнна. Из хоам «Сердалога» бир МВД.
Полице болхлоша баьча тохкамах, 13 шу даьнна кӏаьнк, ара боад эттача хана, ловзаш ваьллав кхыча берашца, цаховш цунца ловзаш ваьллача 18 шу даланза волча кӏаьнка пневматически тепчаца хинна хӏама да из.
«Карарча хана лозаваьр дарбанче ва, тепчан пхо басилга чу сецаб цун, из хьабаккха кийчо еш ба лораш. Тепча хиннача кӏаьнкаца къамаьл даьд, герз дӏадаьккхад. Из тайпара хӏама хьалхара нийслуш дац Россе. Маркетплейса оагӏонашка гӏолла пневматически герз ийдеш, вӏаший човнаш еш хӏама леладу тахан бераша. Даьшка, ноаношка кхайкарал ду! Боккъал а тӏахьожам лоаттабе шоай берашта, интернете гӏолла пневматически герз ма ийдайта царга; шийна, иштта гонахьарчарна зе де тарлуш да из», - белгалду Магасерча Россе МВД оагӏон ПДН инспектора Пхьилекъонгий Хьавас. Из гӏулакх дикка тохкаш да ӏаьдал, кӏаьнка даьна, нанна духьала административни протокол оттадаьд, бехке волчунца къамаьл даьд.
Хӏара дезала юкъе дувца дезаш хӏама да пневматически оала герз кхераме, иштта леладе йиш йолаш доацилга. Доккха зулам хьахила йиш я цох, из аьшка бурилг сага бӏарга чу нийслойя.
