ГӏалгӀай мехка тӀахьийхар, дешара даькъ тӀара деррига хьал дика вӀашагӀдоллара
Магаса дешара Центре, ГӏалгӀайчен дешара, Ӏилман министра Цхьорой Ахьмад-Башира кулгал а деш, яьржа кхетаче дӀайихьар. Цунна чуйоагӀача министерствай викалашца цхьана цига дакъалоацаш хилар дешара моттигий кулгалхой. Доакъашхоша чаккхе йир 2026/2027 керда дешара шу дӏадоладалар чулоацаш, иштта белгалдир керттера декхараш. Цига дийца лоархӀаме дош дар дешархошта дӀайха даар лоаттадар, из дӀакхоачаш хилар, цун дикал, кхерамзле хилар.
«Дешара шу дӀадоладалар - из ха эггара чӀоагӀагӀа дешара даькъ тӀара болх вӀашагӀболла беза ха я. Вайна хьалхашка латт лоархӀаме декхараш. Уж кхоачашде деза цахаддаш терко лоаттаеш, хӀара даькъ тӀа бехктокхаме саг волаш цу юкъе, дӀайха даар лоаттадеш» - аьлар Цхьорой Ахьмада «Сердало» газетаца ше къамаьл деш.
Кхетачене иштта дийцар, керда дешар дӀадоладелча лоархӀаме да хьехархой шоайла новкъостал деш хилар. Министерство, доал деча даькъ тӀара ӏаьдал, ишкола администраци, хьехархой тоаба бувзам болаш хилча, кхоачамбоацараш нийслургдац.
Цар цхьана болх дӀахьош хилча, берашта а дешара дика хьалаш лоаттаде таро хургья.
