Гӏалгӏай мехка дӏахьош ба «Юкъарлон кхелаца салоӏаш йоаккха ха» яха болам
Гӏалгӏай мехка кхоачашъеш я «Юкъарлон кхелаца салоӏаш йоаккха ха» яха йоккха ерригроссийски проект. Из чӏоагӏйир 11 шу хьалха, Россе МВД чуйоагӏача Юкъарлон кхела Президиумо хьаллоацаш. Цун керттера декхар да ахкан замалахьа бераша салоӏа ха дика вӏашагӏйоллар, царна эшаш дола хьалаш хьакхоллар.
«Укх деношка Илдарха-Гӏалий тӏа «Кхерамзле йола гӏашло» яха хьехам лу кхетаче дӏайихьар болама чуйоагӏаш. Цига дакъа лоацаш Гӏалгӏайче гӏолла йолча МВД чуйоагӏача Юкъарлон кхела секретарь Амаканаькъан Хьусен, Илдарха-Гӏалий тӏагӏолла йолча Россе ОМВД чуйоагӏача Юкъарлон кхела кулгалхочун гӏонча Овшанаькъан Амбулат, Госавтоинспекце викалаш бар. Юкъарлон, полице болхлоша, дӏабихьар шахьара бахархошца, водителашца, наькъа доакъашхошца хьал довзийташ бола болх, иштта хьалхадаьккхар наькъа бокъонаш лорае езилга, къаьстта нах наькъа дехьабоалача моттиге. Цига иштта терко тӏаяхийтар самокаташ, велосипедаш, скутераш лелаеш хилара, къаьстта цу гӏулакха теркам беш хила беза водителаш, аьнна, хьалхадаьккхар доакъашхошта», - яхаш, дийцар «Сердало» газетага мехка МВД зарбан болх лелабераша.
Кхетаченна чудоагӏаш, Амаканаькъан Хьусена, Овшанаькъан Амбулата вӏашагӏделлар берашта хьехама лекци дӏаяхьар. Цар хьоахайир чоалхане моттигаш: наркотикаш лелаярах уголовни бехктокхам; экстремизма, терроризма духьала къовсам лоаттабар. Ондаргашта хьалхадаьккхар онлайн-тийшаболх лелабеш киберзуламхой хилар.
Цунца цхьана шахьара наькъашка ДПС болхлоша, Юкъарлон кхела доакъашхоша машинашца лелача нахаца, гӏашлошца болам дӏабихьар, царна делар наькъа кхерамзлен бокъонаш тӏайола йоазош.
