Гӏалгӏайче дӏахьош я «Гӏалай, легендай мохк» яха фам-тур
Ерригача Россера хьалхале лелаю туроператораш, Гӏалгӏайчен тамашийна «Гӏалай, легендай мохк» яха фам-тура чубоагӏа болх дӏахьош ба. Цу проекто вӏашагӏтехар 30 туристически даькъ тӏара викалаш, блогераш. Уж ба тайп-тайпарча мехкашкара. Цун керттера декхар да республикан мах бола исторически, культуран тӏехьале йовзийтар, цун хоза ӏалама моттигаш гойтар. Из болх дӏахьош я «Сириус» яха компани, «Гӏалгӏай мехка вахар» яхача къаман туроператорца цхьана, «Туризм, хьаьша тӏаэцар» яхача къаман проекта чудоагӏаш, аьлар «Сердало» газетага республикан Паччахьалкхене.
Уж баха безаш бола никъ бар, юкъерча бӏаьшерений къаьнарча гӏалашка бодаш. Уж хилар Хамхе, Аьга-Кхале, Бишта гӏалашка, царна иштта дайра Россе къаьнарча кераста дин езача моттигех цаӏ лоархӏаш дола Тхьаба-Ерд оала элгац, иштта уж хьежар Пхьуй яхача ширача юрта даькъ тӏарча тамашийнача къаьнарча хӏамашка.
Цар къаьстта терко тӏаяхийтар «Тӏехьале» яхача гӏишлонхой- меттаоттадара ишкола, цига тахан юха хьакхоллаш ба вай даьша йита балха говзал тохкаш бола болх. Ӏалама хозалцара доакъашхошта вӏалла йицлургйоаца оагӏув хилар Цӏай-Лоама дукъ тӏа балар.
Тоаяьча, хьажара лаьрхӏача 2 100 метр лакха йолча майдан тӏара дика го йиш яр Даькъастен лоамаш, турбизнеса доакъашхоша цу хозалах биза бала ца могаш цхьа ха яьккхар.
Кхелахошта хьалха кхы а кӏезига дац хьаделла дезараш - тура программа чудоагӏаш да хозача ӏалама моттигашка бахар; Паьлинг, Ний, Цхьори яхача юртий гӏалашка хьажар, царех а хургья царна йицлургйоаца Гӏалгӏайчен лоамера хоза оагӏонаш.
