Уж гӀишлош латт Нохчий-Гуржий доазонаш вӀашагӀкхетача лакхача гув тӀа.

Укхаза, карарча хана, ца йохаш кхо тӀема гӀала я, нах чубаьха 30 совгӀа гӀала я, 12 малхара каш да, хьалхарча ханашка бусалба наха шоай нах дӀабийхка моттиг, иштта цу ханашка хинна бусалба наьха маьждиг да укхаза, из хилар белгалдир дин тохкамаш деш болча наха, нах чубахаш хиннача гӀалаех дисача даькъ тӀа къаьнара къубба я. Цул совгӀа, цу гӀалай даькъ тӀа шиъ хьайра хинна моттиг а я белгалйоалаш.

«Тӏема гӀалаш дикка лакха я, ерригаш а хаьрцаяц уж. Хӏанз а хоалуш я кораш лаьтта моттигаш, тӀема низ тӀабоагӀаш хуле а, лаьрххӀа хьаяь чура ченаш, чура чувоалаш хинна моттигаш, кхычарна тара йоаца къаьнарча гӀалгӀай Ӏадаташ хьагойташ йола къаман белгалонаш. Шоаш хьалъяь геттара дукха ха яле а, гӀишлош тӀа тайп-тайпара белгалонаш йисай.

Тхов шаьра ба, саьнашка зӀамига ира загалаш а дагӀаш. Цига хьалъяь хинна гӀалаш а цӀенош а вӀаший юхе кхотаденна дагӀаш да, шоайла чӀоагӀо еш йола цхьа гӀала санна вӀашагӀ а хетта.

Юрташта юххе массехк моттигашка дӀа-юха кхайса да кашамаш. Уж даьд хьекха доацача кхерех, кӀираца шоайла дувзаш, уж тӀера ӀажагӀча бесара да. Царех ахаш совгӀа, шоаш хиннача лакхача моттигашка латт. 2022 шера чухаьрца хинна малхара каш, дӀадахача шера гурахьа меттаоттадир», - цу тайпара тамашийна къамаьл хилар «Сердало» газета корреспондентаца музея-заповедника болхлой.

Шоаш цига хьожаш, цу урхаллен болхлоша, шоай балха чудоагӀаш из хиларах тарра, культуран тӀехьален гӀишлош лораяра болх дӀабихьар. Каьхаташ оттадир лакхача моттиге латтача гӀалай технически хьал белгалдеш, дӀахо болх бара лакхехьа латтача Ӏаьдалга из хьал дӀакхоачийтаргда.