Гӏалгӏай мехка дӏахо дӏахьош ба, лораша дӏа-юха ухаш бу болх
Гӏалгӏайчен лораш, мехкарча нах бахача юрташка дӏа-юха ухаш, болх дӏахьош ба. Цу тайпара лорий къахьегам хилар бахьан долаш, наьха таро я шоаш бахача моттиге, цӏагӏара арабаьнна гаьна дӏабаха ца безаш, лорашка чакхбала. Лела могаш боаца унахой болча лораш шоаш дӏаболх.
«Аргӏанара болх вӏашагӏбеллар Шолжа кхалерча керттерча дарбанчен говзанчаша. Лораш хьежар Шолжа-Шахьара, иштта Берда-Юрта, Арште бахархой могашалга. Уж чакхбоахаш, царна корадир хьалха ца хинна лазараш. Хьалхара гучадаьлар цхьабарашта шекар, лакха давлени хилар. Цу наха могадир эндокринолога тӏабахар. Къаьстта йола терко тӏаяхийтар дӏалелалуш боацача наха. Лораш уж болча фусамашка шоаш дӏабахар. Цхьабарашта могадир дега лораца, эндокринологаца дагабалар», - аьлар «Сердало» газетага Гӏалгӏайчен унахцӏенон Министерстве.
Нах бахача моттигашка дӏаухаш, уж лорашка чакхбоахаш хилара болх, кхы а дукхагӏа юрташ чулоацаш, дӏахьош ба. Илдарха-Гӏалий тӏа, керттерча маьждига юхе дӏахьош бар из болх. Пӏаьраска дийнахьа ламаз даь арабоагӏача наьха таро хилар, шоай могашал миштай хьажа. Иштта лораша къамаьл дир нахаца, царна хьалхадаьккхар могашал лораяра хьал мишта хила деза.
Каст-каста лораш нах бахача моттигашка дӏаболхаш, лазар дий хьожаш, уж лорашка чакхбоахаш леларах, хронически оала лазараш даржаргдоацаш юхатоха таро хул. Гӏалгӏайчен лораша дӏа-юха ухача кепара болх дӏахьош хилар ӏадат хинна дӏаэттад, лорашка гаьна дӏабаха ца безаш, наьха таро хул шоай могашал йовза.
