«Гӏетташ йола пхьоалле» яха парапланеризма фестиваль дӏахьоргья вай мехка
Укх шера ахкан тӏехьарча бетта 31-ча денгара гуйран хьалхарча бетта 5-ча денга кхоачаш, парапланеризма «FLYLAB» фестиваль дӏаяхьа лерхӏ вай мехка. Цу гӏулакхацара керттера моттиг 3 км лакха бола Маьтлоам хургба. Российски, иштта кхыча мехкара кхаьчача цу оагӏонцарча говзанчаша шоай начӏал гойтаргда вай мехкарча лакхача гувнашта, лоамашта лакхе гӏолла гобоахаш.
Республкерча культуран гӏулакхех йолча министерствос хьаллоацаш, дӏахьош болх ба из.
«Жӏайрахь» яхача хьаьшацӏагӏа, Ний гӏалай моттиге ӏеш хургба фестивала доакъашхой. Парапланеризм йоаржаяра тӏехьа дӏахьош ба из болх. Маьтлоам тӏара айбалар, лоаман моттигашкара экскурси, къаман даараш довзар да цу программанна юкъе. Тайп-тайпарча мехкашкара 30 парапланерист ва дакъа лоацаргдар», - дийцар «Сердалога» культуран гӏулакхех йолча министерстве.
Цу гӏулакха хьалхаэттараш «FLYLAB» яха фестиваль хӏара шера дӏакхахьа лаьрхӏа ба вай мехка. Республикера туризм йоаржаяра оагӏонца, лоархӏаме дакъа дӏалоацаш хургда из гӏулакх.
