Дешара бокъонаш лораярах бахархой тӀаийбу ди дӀахьоргда мехка
13.07.2026 14:50
Дешара оагӀонцара бокъонаш лораярах дола бахархой тӀаийбу ди дӀахьош хургба укх бетта 15-ча дийнахьа вай мехка. Сага бокъонех вола викал ЦӀечой ИбрахӀим ва наьха хаттараш доашхаш хургвар.
«Кхетаче дакъа лоацаш хургба дешареи Ӏилмани гӀулакхех йолча министерствон болхлой: министерствон кулгалхочун гӀончан декхараш кхоачашдеш йола Мужахой Мадина, берашта хьехам баларах болча оагӀон керттера болхло Къулбужанаькъан Ӏайна.
Иштта цхьан дӀахьоча кхетаче дикагӀа гучадоал бахархошта къувлараш, царна дух тӀа бала ца мога хаттараш», - дийцар «Сердалога» мехкарча УПЧ. Дешара оагӀонцара бахархой бокъонаш лораяра тӀехьа, чӀоагӀа лоархӀаме болх ба из. ХьатӀавоагӀача сагага ший паспорт, иштта ше тӀадахьа хаттар дикагӀа довзийташ дола каьхаташ хила деза.
