«Дикаш Хьалхарбарашца» яха моттигерча гӏо деш леларий кхетаче хургья Гӏалгӏайче
Маьцхали бетта 28-ча денгара 30-ча денга кхаччалца, «Мужече» яхача спорта кийчо еча моттиге моттигера эггара кадайгӏа, хьинар долашагӏа, гӏо де массахана кийча бола къонабараш гуллургба. Юкъарча доккхача дикашта кийча болча «Дикаш Хьалхарбарашца» яхача гӏо дечар тоабан кхетаче дӏахьоргья цу моттиге.
«Сердалога» бенача хоамах, кхо ди дӏалоацаш программа я йоаржае лерхӏар. Цу юкъе хургда къонабараш ӏомабар, царна цхьацца хӏамаш хьехар, лекцеш ешар, иштта дог ӏаббалца салаӏа йиш йолаш хургба уж. Хӏара доакъашхочун шийна хетар ала, доаржаде, кердача, боккхача наькъ тӏа гӏа баккха, дукхача дикашка кхача аьттув луш гӏулакх да из.
Къонабарашта цхьацца кердадараш довзийтарах болча оагӏонца таханарча вахара оагӏонцара технологеш, тоабанца болх дӏабахьар, ӏа доаржадеш дола хӏама кхычарна тешаме хетар, лаьрхӏачунга кхача хьалхара гӏа баккхар мишта хила деза дувцаргда цига. Къаьстта терко еш ба гӏо дерий тоабашта хьалхалаттачарна, хӏана аьлча цу оагӏонцарча балхах дола декхараш дикка шаьрдаь хила беза уж.
«Дикаш Хьалхарбарашца» яхар духхьал лекцеш, воркшопаш, говзанчашца хӏама ӏомадар хинна ӏац. Лаьрххӏа вӏашагӏбеллача цу боккхача балха юкъе, гӏо дечарех хӏаране ший гӏулакхацара кхетам лакхбе, ший проект йовзийта, кхыбарашкара пайдане, беркате хургдар хьаэца, ше санна барашцара бувзам чӏоагӏбе, дунен хӏама дикача оагӏорахьа хувцаргдола доккха гӏулакхаш цхьана доаржаде аьттув ба.
