Гӏалгӏай мехка дӏахьоргья Ерригроссийски фольклора-этнографически экспедици
Гӏалгӏайче чуйоагӏаш я карарча шера Ерригроссийски фольклорно- этнографически экспедици дӏахьош йолча Россе 15 мехка. Из проект лаьрхӏа я вай мехка мах бола моттигаш, этнокультуран тӏехьале тахкара, лораяра.
«Тохкама ха дӏахьош я 2022 шера денз, Российски Федераце культуран Министерствос хьаллоацаш. Болх дӏахьош ба № 402-ФЗ «РФ материальни йоацача этнокультура тӏехьален Федеральни законах», из чӏоагӏдаьд 2024 шера Россе Паччахьалкхено, 2030 шерга кхаччалца Россе материальни йоацача этнокультура тӏехьале дегӏайоалаяра, лораяра ларда тӏа.
Дӏадахачат 2022-2025 шерашка, Паччахьалкхен В. Д. Поленова цӏерагӏча Российский халкъа кхоллама Цӏено, цӏихезача ӏилманхошца-фольклористашца дӏайихьар 58 экспедици, цу юкъе гучаяьлар, чӏоагӏйир 130 совгӏа мах бола культуран тӏехьален моттиг», - аьлар «Сердало» газетага Гӏалгӏайчен халкъа кхоллама Республикан Цӏен кулгалхочун гӏончас Котанаькъан Марема.
Гӏалгӏайче цу юкъейоагӏаш хиларо таро лу ӏилманхошта дика ӏомаде, каьхаташца чӏоагӏде дицденна дӏадалар кхерам бола къаьнара ӏадаташ, халкъа багахбувцам, ӏадатех латта болх, кулгаговзал, гӏалгӏай къаман оамалаш, уж хургдолча ноахалашта ӏалашде.
Керттера, эггара чӏоагӏагӏа хьожаш бола фольклора-этнографе экспедице болх хургба документальни фильмаш хьакхоллар, цар ма дарра дувцаргда Россе халкъа белгалонех, ӏадатех. Цу киноленташа таро лу мехка дийнача тӏехьаленга кхача.
Халкъа культура йовзийтара дӏабихьача балхо хӏанззе а хьагойтад дӏадахача шерашка ший пайда лакха хилар. Дӏадахача шин шера, тохкамхоша хьакхеллар 32 тамашийна документальни роликаш. Кердача фильмаша из мах бола архив духхьал хьалйиза ӏац, цох хургья лоархӏаме дешара, хӏама довзара таро.
