ГӀалгӀайче дагестана говзанчий гойтам дӀахьоргба
Лайчилла бетта 19-ча дийнахьа, республикан исбахьален говазлий музее дӀахьоргба селий дика вовзаш волча кхаь сага «Махачкалера - безамца» яха гойтам. Из хоам «Сердало» газетага бир музея зарбан болх лелабераша.
Ший балхаш ГӀалгӀайчен бахархошта, хьаьшашта гойт Селий Республикан цӀихезача суртанчас, РФ суртанчий Союза доакъашхочо Магомедалиев Мухьмад-Ӏаьлас; дошопхьара, РФ суртанчий доакъашхо волча Ахмедов Хилриильяса, цӀастапхьара Шейхов Ӏумара.
«Гойтаме кулгаговзалца кхелла балхаш го таро хургья, цига хургья цӀаста пхьегӀаш, дошо хӀамаш, дахчан балхаш, кхы дуккхадараш. Иштта гойтама чубоагӀаш ба Кубачера дошох хӀамаш хьаярах, Унцукулера дахчан тӀа сурташ дехкарах, аьшках говзаме балхаш дарах бола говзанч-хьехам», - аьлар хоамо.
Белгалдаккха дезаш да, цу гойтаме безам тӀабодаш хургда говзача пхьарий балхаш, цул совгӀа, шийна хоза хийттар эца йиш а хургья.
Гойтам вӀашагӀбеллар ГӀалгӀай Республикан культуран Министерство я, гӀалгӀай паччахьалкхен 100 шу дизара хетабаь ба из.
