«Майралла кӏопилг» яха болам ба, вай мехка дӏахьош
«Цаӏ йола Росси» яхача парте хӏама хьаллоацараша, моттигерча оагӏон кулгал деш йола Гӏулой Анжела хьалха йолаш, «Майралла кӏопилг» яха Ерригача Россе гӏо дарах бола болам дӏаболабир. Дарбанче дукха ха йоаккхаш, дегӏа могашал меттаоттаеш долча берий дог хьаста лаьрхӏар партийцаша, иштта царех дог лазаш болча бахархоша.
«Тайп-тайпара ловзоргаш, книжкаш, къоаламаш, альбомаш, иштта кхыйола берашта эшаш йола хӏамаш я гулъераш. Уж еррига хӏамаш тахан вай массане дог хьастар эшача берашка дӏакхоачаргья. Дукха ха йоаккхаш дарба деш долча берашта доккха совгӏат хул иштта терко ярах, мах баь варгвоацаш да цар гӏадбахар, хӏаьта вӏалла вовзаш воацача сага даь дика къаьстта дог гӏоздоаккхаш хул царна.
«Майралла кӏопилг» яхар духхьал ловзоргаш, книжкаш хинна ӏац, бера геттара хала долча хана, цо массане йӏовхалга сатувсача деношка, цун терко яр да из, хӏаьта могаш доацача берашта из къаьстта чӏоагӏа эшаш да», - дийцар «Сердалога» Гӏулой Анжелас.
«Майралла кӏопилг» яха болам хьаллоацараш дукха ба вай боккхача мехка. Уж еррига хӏамаш бераш долча дарбанчешка дӏа-хьа хьоргья.
