«Къаман кросс - 2026» яха адарах Ерригача Россе болам хилар вай мехка
«Къаман кросс» яха Ерригача Россе спортацара цӏай дӏахьош хилар вай мехка. Шоай вахар кадай болаш дӏадахьа ловш бола дукха нах гулбенна моттиг хилар цох. Царна юкъе бар вузашкара студенташ, дешархой, цхьацца моттигашкара болхлой, спортаца бувзам лелабеча дезалера нах. Берригаш тайп-тайпарча ханага кхаьча хилар теркалдеш, кийчо яьяр цига. Ялх шерал дукхагӏа даьнна, зӏамига, боккха нах бар бовда арабаьннараш. Ах километрага кхоачаш бовдаш бар эггара зӏамагӏбараш, хӏаьта боккхагӏбарашта кхо километр доазув къоастадаьдар.
«Котбаьннараш белгалбеш дӏадийрзар массане дог ураоттадеш хинна из гӏулакх. Россе спорта гӏулакхех йолча Министерствон Кубкаш елар боккхагӏа болча белгалбаьннарашта, иштта майдилгаш, дипломаш тийлар. Совгӏаташ дӏадийкъар вар спорта гӏулакхех йолча министерствон кулгалхочун гӏонча вола Султиганаькъан Тӏахӏир, иштта Йовлой Берда цӏерах йолча «Магас» оалача спорта цӏен кулгалхо Тимаркъанаькъан Джамбулат, мехкарча яйгача атлетиках йолча Федераце президент Манкенаькъан Рая», - «Сердалога» из хоам бера мехкарча цу оагӏонцарча министерствера.
Ерригача Россе боаржабь, берригаш цхьана арабаьнна бовдаш бола болам, укх шера Россе къамаш цхьанкхетара Шера хетабаь ба. Боккхача мехкара адам цхьана, барт, бувзам лорабеш долга хьагойтар цу гӏулакхо. Калининградера Гаьнарча Малхбоаленга кхаччалца – Россе 85 миӏинге хьаллаьцар из гӏулакх.
