Культуран, туризма министерствон карагӏдаьннар дувцаш, кхетаче хилар мехка
Культуран, туризма гӏулакхех йолча министерствон аргӏанара кхетаче дӏайихьар Шолжа кхален культуран Цӏагӏа. 2025-ча шера кхоачашдаьрех, иштта укх шера дӏабахьа безача балхах дийцар гулбеннараша. Кхетаче дакъа лоацаш бар Паччахьалкхен вице-премьер Мутаӏаланаькъан Хьажбикар, Халкъа Гуллама вице-спикер Хьаьшанаькъан Аза, культуран, туризма гӏулакхех йолча министерствон хьалха латта Лаьнанаькъан Залина.
«Цхьацца кхоачамбоацараш нийслой а, болх толамца дӏабахьа аьттув боалл тха тахан. Цу оагӏонца гӏо деш ва мехкада Келаматанаькъан Махьмуд-ӏаьла. Дӏадахача шера 3000 гаргга кхетаченаш дӏайихьай, 2 миллион совгӏа наха дакъа лоацаш.
«Дезал» яха къаман проект йоаржаярца дикка толам боаккхаш да тхо, таханарча кердадарех йола ши ишкол я мехка болх дӏахьош, иштта къамашта юкъера кхетаченаш дӏакхахьара болх а боаггӏача боараме дӏахьош ба», - белгалдир Лаьнанаькъан Залинас кхетаче хьаеллаш.
Министра гӏонч йолча Куртойнаькъан Маккас балхаца кхоачашдаьрех дувцаш, доклад йир цига. 2025-ча шера дӏабихьача балхах, иштта дӏахойодача ханаца лоархӏамедарех дийцар цо. Гулбеннарашта хьинаре къахьегарах баркал аьлар министерства кулгалхочо, 2026-ча шерара декхараш а иштта бехктокхаме кхоачашдара тӏахьийхар.
