Дегӏа могашал эшаеннарашта юкъера спартакиада дӏайихьар мехка
«Магас» яхача Йовлой Берда цӏерах долча спорта Цӏагӏа дегӏа могашал эшаеннарашта юкъера спартакиада дӏайихьар. Цига гулбеннабар СВО ветеранаш, иштта бӏаргса эшаденна, дегӏа маьженаш лертӏа болх беш йоаца, хӏама дӏахазар эшаденна бола атлеташ. Яхьа программан юкъе яр истола тӏара теннис, армрестлинг, футбол, жӏакаш. Деррига хӏама цу наха паргӏатагӏа хургдолча тайпара кийчо яь дар. «Сердалога» «Даьхен лорабой» яхача ганза филиала кулгал деча Абаьданаькъан Ислама дийцачох, тӏема операце ветеранаш болча наха ишттача оагӏонцара яхь дӏаяхьар чӏоагӏа лоархӏаме да.
Шоай дегӏага болх байтара, цхьацца гӏулакхе дакъа лацара тӏехьа лоархӏаме да из. Тӏема аренашкара мехка цӏакхаьчача наха чӏоагӏа эшаш да из, дегӏа низ чӏоагӏбе, дог ураоттаде. Из теркалдеш ба тахан мехка.
Котбаьннарашта совгӏаташ дӏадекъаш кхетаче хилар цига. Кулгаш гӏортадарах дошо майдилг йоаккхаш, белгалваьлар Налганаькъан Мухьмад, дото майдилгаш ӏоэхкар кхаь атлета: Малсаганаькъан Салима, Албохчанаькъан Джабраила, Хазанаькъан Адама. Кхоалагӏча моттиге оттарах, борза майдилг кхаьчар Баьтаранаькъан Мухьмада.
Ше-ше котвала гӏерташ бар жӏакех ловзаш хиннараш а. Чемпиона цӏи луш, дошо майдилг ӏоэллар Мурдаланаькъан Замбека. Шоллагӏча лагӏа тӏа ваьлар Йовлой Ӏумар – дото майдилг яьккхар цо, хӏаьта кхоалагӏа моттиг Чопанаькъан Мухьмада елар. Яхьашка котбаьннараш даькъалабувцаш, къамаьл дир яхье.
