СВО ветеранашта болх бе моттигаш ӏалашъеш йола ярмарка дӏайихьар мехка
«Даьхен лорабой» яхача ганза мехкарча филиала доазон тӏа гулбелар, вахаре цхьаццадараш хувца, керда болх харжа ловраш. Къахьегама гӏулакхех йолча министерствоцара, республикерча цхьацца моттигашцара болх лохарашта хоржам бе аьттув луш бар цига. Тӏема операце ветеранашта, цар цӏагӏарча наха болх бе моттигаш ӏалашъеш ярмарка хилар цох. Мехкарча паччахьалкхен моттигашта хьалхалаттарашца къамаьл де, шийга товргба аьнна хета болх лаха аьттув бар цига.
«70 совгӏа саг вар ярмарке дакъа лоацаш. Технически, гӏишлон, ИТ оагӏонашцара, иштта паччахьалкхен доакъошцара болх бе моттигаш йовзийташ бар ярмарке. Ханнахьа хьалуш дизза алапи долаш, цу оагӏонца дувзаденнараш хила боаггӏача боараме лертӏа долаш, моттигаш я уж. Къаьстта терко еш бар цига тӏема аренашкара заӏапхой болаш цӏабаьхкача ветеранашта. Цул совгӏа, ший доалахьа цхьа гӏулакх хьаделларгдолаш ахча эцара гӏулакхаца кхоачашде дезараш малагӏаш да белгалдир ярмарке», - дийцар «Сердалога» «Даьхен лорабой» яхача ганза филиала болхлоша.
Цунна кулгал деча Абаьданаькъан Ислама белгалдечох, тӏема операце доакъашхошта цхьацца говзал караерзае, болх лаха гӏо дар керттерча декхарех да. СВО ветеранаш къахьега ловш ба, хӏаьта мехкарча дукхача моттигашка керда болхлой эшаш гӏулакх да, цунга хьежжа шинна оагӏонна аьттув болаш хул из.
Филиала доазон тӏа иштта йола ярмаркаш каст-каста дӏакхахьа лерхӏ.
