Исбахьален гимнастиках йола яхьаш дӏайихьар вай мехка
Исбахьален гимнастиках йола мехкашта юкъера «Къамий доттагӏал» яха яхьаш дӏайихьар «Мужече» яхача спорта кийчо еча моттиге. Мехка тайп-тайпарча миӏингашкара цу оагӏонцара начӏал дараш бар цига гулбенна хиннараш. «Шин оагӏонца дӏахьош яр яхьаш. 12-13 шераш даьннарашта юкъе лакхерча лагӏа тӏа бала аьттув хилар Москверча хьаьший. Дошо майдилг йихьар Гончарова Каринас, дото майдилг Слободяк Миланайна ӏоэллар, хӏаьта кхоалагӏча моттиге эттар Адреева София.
14-15 шераш даьннарашта юкъе хьалхарча моттиге Богниченко Юля эттар вай мехка «дошув» доаккхаш, шоллагӏа моттиг Захарова Марияйга кхаьчар, хӏаьта борза майдилг ийца яхар Ставрополера Соколова Полина», - йоах «Сердалога» бенача хоамо.
Лоархӏаме моттиг дӏалоацаш хилар котбаьннарашта совгӏаташ дӏадалар, баркал алар. Россе спорта говзанчий удостоверенеш денна белгалбир Лунина Яна, Демидова Валерия, Савельева Валерия, Арефьева Александра, Боронина Ксения, Маркова Анна. Турнир дӏахьош дикка къахьийгар хьехамчаша, цу гӏулакха хьалхаэттараша.
Исбахьален гимнастика йоаржаяра тӏехьа дика къахьегарах, баркал оалаш грамоташ елар тренерашта Владимирова Иринайна, Кузнецова Кристинайна, Коновалова Ульянайна, иштта яхьий керттерча судхочунна Русакова Надеждайна, керттерча секретара Максименко Нинайна.
