Шолжа-Шахьар – Горагорск – МагӀалбик яха никъ тоабеш латт
24.07.2025 09:23
2024-ча шера дӀаболабаь, 22, 8 км бола Шолжа-Шахьар – Горагорск– МагӀалбик яха никъ тоабеш латт вай мехка. ДӀадахача шера 10 км никъ тоабаьбар, хӀаьта укх шерарча бӀаьстан хана 2, 3 км никъ меттабоалабаьб.
Карарча хана наькъа тӀеххьара дакъа тоадеш боахк болхлой. Республикерча Минавтодортранса белгалдечох, шолха асфальт Ӏобилла кийчо еш боахк цига. Цул тӀехьагӀа, гӀашлой никъ тоабеш, наха дехьабувла моттиг къоастаеш, басарашца юкъе оасаш деш, наькъашкара бокъонаш йовзийташ йола гӀармаш оттаеш къахьегаргда цига.
Укх шерарча оагӀой бетта чакхбала безаш ба никъ тоабеш бола беррига болх. Респбликера машиний наькъаш меттадоаладарах йолча паччахьалкхен программага гӀолла, чакхбоаккхаш ба из боккха, лоархӀаме болх.
