ГӀалгӀайче тӀахьожам лоаттабу культуран тӀехьален гӀишлошта
ЖӀайрахьа-Ахабоарзен историко-архитектурни, Ӏалама музея-заповедника доазон тӀа, даим дӀахьош да культуран тӀехьален гӀишлош тоаеш, уж тӀахьожаме хургйолаш дӀаязъеш, тохкаш дола балхаш.
Иштта цу тайпара аргӀанара болх дӀабихьар Эбан, Кели, Дошхьакхале, Пхьуй,ТӀумагӀ, Морч яхача гӀалай моттигашка. Цига бахар музея-заповедника кулгалхочун декхар кхоачашдеш вола Сампенаькъан А. А., ГӀалгӀай Республикан культуран тӀехьален паччахьалкхен гӀишлош лораяра йолча Комитета викал Ӏаспенаькъан М. Г, «АСМ Групп» керттера кулгалхо Михайлов А. Г.
«АргӀанара тӀахьожама болх дӀахьош, Пхьуй, Кели яхача гӀалай моттигашка гучадаьлар кхоачамбоацараш, уж юстардахара лакхехьа латтача Ӏаьдала болхлоша, законо дӀадеххача тайпара лостам бергба», - аьлар «Сердало» газетага музея-заповедника зарбан болх лелабераша.
