Гӏалгӏай къаман исторех кино доаккхаш, болх ба мехка дӏаболабаь
Гӏалгӏай къаман исторех, ӏадатех документальни кино доаккхаш болх ба мехка дӏахьош. Из доаккхача тоабаца республике кхаьчача «Къамий цхьанкхетар: ӏадаташи лоархӏамедараши» яхача проекта хьалха латтача Лянге Маргаритайца кхетаче дӏайихьар Паччахьалкхенна кулгал деча Сластенин Владимира. Иштта цу кхетаче дакъа лоацаш вар къаман политиках, чухьарча бувзамах йолча Министерствон кулгалхо Мизенаькъан Руслан.
«Къамий цхьанкхетар: ӏадаташи лоархӏамедараши» яхача документальни оагӏонна чудоагӏаш хургда из кино. «Къаман белгало» яхача федеральни оагӏонца доаржадергда из этнологех, антропологех РАН, РАН Российски исторех йолча Институто хьаллоацаш. Кино даккхара болх мехка дӏахьоргба тов бетта 27-ча денгара ардара бетта 2-ча денга кхаччалца. Вай къаман истори, таханара вахар ӏадаташка, культуран техьаленга, бахархошка гӏолла массанена дӏагойта гӏерт проекта автораш. Кинон юкъе хургда республикан паччахьалкхен белгалонех, къаман меттах, къаман тӏема исторех, ӏадаташцарча кулга-говзалах, къаман спорта оагӏонех, говр хахкарца, вай даьй гӏалаех, иштта кхыдолча, истореца лоархӏамечарех долча хӏамаех. Къаьстта терко ергья бахархошта - цхьацца хӏама хьадечарна, агропромышленни оагӏонца къахьегарашта», - дийцар «Сердалога» мехкарча Паччахьалкхено.
Иштта Россе кердача моттигий хӏама тоадара тӏехьа вай республико дакъа лацар а юкъехьоргда цу кинонна. 2023-ча шера денз, Запорожски областа Токмакски кхаленна гӏо лоаттадеш, бахархошта шоай гӏулакхаш меттадоаладе новкъостал деш я республика. Цу гӏулакхо къаьстта дика хьагойт боккхача мехка миӏингашкара нах цхьанкхеташ, вӏаший оагӏув хьаллоацаш хилар.
Сластенин Владимира цу кхетаче белгалдир, моттигера Кабмин цу оагӏонцарча бувзама кийча йолга. Кинематографистий болх вай мехка боаггӏача боараме дӏагӏоргболаш мел эшача хӏаманга хьожаш, гӏо деш хургба республике.
