Халкъашта юкъера «Чура гушдар» программа дӏаязъеш ба вай мехка
RT телеканале араювлача «Чура гушдар» халкъашта юкъерча программан кердача оагӏон болх дӏахьош ба тахан вай мехка. Вай республикера культура, къаьнара истори, къаман беркате, ший тайпара дола, даьшкара хьакхаьча ӏадаташ довзийтаргда цар дерригача дуненна. Журнилисташа геттара чӏоагӏа терко ер да вай лоамашкара ӏалам, къаьнара гӏалаш, бахархоша тӏехьенгара тӏехьенга телаш, лорадеш дола гӏулакхаш.
«Хьаьшашта цар бенача наькъа гӏо деш, деррига хьатӏадоаккхаш, дӏаяздеш дӏахьоча балха юкъе хьалхарча дийнахьа денз дакъа лоацаш къахьегаш ба тха болхлой. Даьй баьхача гӏалай истори, чӏаьпилгаш хьадара гойтама болх, чхара тӏагӏолла урагӏъахар - гойтама болх дӏаязбе лаьрхӏа я из тоаба. Иштта цу юкъе да говраца Жӏайрахьа чӏожен моттигашка гӏолла гобаккхар. Квадрокоптерца вай лоаман моттигаш хьатӏайоахаш болх дӏабахьа пурам делар царна, мел эшача хӏаманца новкъостал дир», - йоах «Сердалога» культурани туризмаи гӏулакхех йолча Министерствера кхаьчача хоамо.
Къаьнарча Гӏалгӏайчен дега юкъе ядача моттигий истори, ӏадаташ дерригача дунен довзийташ сюжеташ араяргья кастта. Из деррига дӏахьокхарал совгӏа, тхьоврарча хана денз, вай къаман юкъе лакха лоархӏаш дола хьаьша тӏаэцар, исторически тӏехьале лораяр мишта латташ да довзийтаргда тахан лоаман моттигашка къахьегаш йолча тоабо.
