Вахар хаьдача СВО доакъашхой берашта гӏо деш ба мехкара психологаш
Тӏема аренашка вахар хаьдача бӏухой цӏагӏарча наьха оагӏув хьаллоацаш, могачох царна гӏо деш ба тахан «Даьхен лорабой» яхача ганза мехкарча филиале. Марзагӏанаькъан Мадина, берий психологаца Местой Хьавайца, Даьхен декхараш токхача наькъ тӏа вахар хаьдача бӏухой дезалаш болча яха хилар. Барайтта шерга кхачанза бераш да турпалий дисараш. Тӏоаршхой Махьмуда, Чуранаькъан Башира, Къамурзой Башира дезалашка хилар уж.
«Тӏема аренашка даьй дӏабаьнна дисача берашта чӏоагӏа лоархӏаме да уллув терко е, оагӏув хьаллаца, дог теде нах хилар. Филиала болхлочо ноаношца; эшар, дезар фуд тохкаш; къамаьл деча юкъа, психолог берашца ший болх дӏахьош хилар. Арт-терапи оалача оагӏонца, берашта ӏоткъам хилар малагӏча боараме да, цар дега хьал малагӏча тайпара гӏо эшаш да, хьежар Местой Хьава. Белгалде деза, из тайпара болх дӏакхахьар берашта лоархӏаме долга», - дийцар «Сердалога» «Даьхен лорабой» яхача ганза болхлоша.
Барайтта шерга кхачанза долча берий дегаш хьаста, царна тем бе дукха хӏама эшац, хӏаьта эггара эшача хана тӏема аренашка да дӏаваьнна дисача бера къаьстта лоархӏаме да; массахана гӏо лоаттадар, терко яр, из хала хьал аттача даккхар. Ганза мехкарча филиале йоккха терко лоаттаю цу гӏулакха, хӏана аьлча бера дог дохар воккхачунна халахетар хилар санна дац. Берашта цхьацца совгӏаташ, мерза даараш чудола кӏопилгаш елар цар. Чӏоагӏа гӏаддаха дар бераш, шоаш дагадеха, оагӏув хьаллаьца. Дӏахойодача хана а, тӏатеӏӏа дӏабахьа безаш болх ба из.
