«УнахТӏахьожам» яхача проекта лорий гӏончаш ба, вай мехка болх беш
Бахархой лорашца, дарбанчешца массахана бувзам хургболаш; къахьегаш ба мехка. Цу оагӏонцара моллагӏа хӏама хатта, дашха йиш йола бувзама оагӏонаш хьайийллай «УнахТӏахьожам» яхача федеральни проектага гӏолла Мах гӏирсага гӏолла.
«Бахархой унахцӏенон оагӏонцара хаттараш дашха йиш хилар чӏоагӏа лоархӏаме да. Уж гӏирсаш (чаташ) хиларо дарбанчешца, лорашца хӏара денна бувзаме хила аьттув лу наха, моллагӏа дола кхоачамбоацараш а дикагӏа теркалдеш хул», - дийцар «Сердалога» унахцӏенон гӏулакхех йолча министерствон хьалха латтача ӏалбаканаькъан Зарас.
Дарбанчен, унахочун бувзам хулийташ бола болх ба из. Поликлиникаца, иштта стационарашца дувзаденна моллагӏа хаттар цига гӏолла тохкаргда наха, лораша, модератораша доашхаргда уж. Хаттара жоп лу шин сахьатах латтача хана. Массанена гуш латташ хургда из, цунга хьежжа моллагӏа дола хӏама дикагӏа довза аьттув ба бахархой.
Оршот денгара шоатта денга кхаччалца, ӏуйран бархӏ сахьатагара сайран бархӏ сахьат даллалца, болх беш хургба из оагӏув. Лора тӏавахара когаметта дац из, иштта сиха оарцагӏъухаш бола лораш хьабеха йиш яц цига гӏолла, анализашка хьажийта, молхаш хьаязъяйта е «больнични» хьаделлийта йиш яц. Тахан чӏоагӏа лоархӏаме да вай мехка иштта проект хилар.
