Велосипедаца веначун вахар хадаш хиннача хатара бехкечун гӏулакх тохкаш ба мехка
Велосипедаца воагӏаш хиннача мехкахочун вахар хадаш хатар хиннад Наьсарерча наькъ тӏа. Тов бетта 22-ча бийсан Бакински оалача ураме, гӏишлон балхашта эшаш бола кхоачам бохкача тика гаьна доацаш, хиннад из хатар. 48 шу даьннача сага машин тӏатехай «Лада Гранта» машинаца воагӏаш хинначо, из саг кхалхав, лораш хьатӏакхачале.
«Машин лоаллаш хинначо белгалдечох, ара боад латташ вилосипедаца воагӏар зийнавац цо, цун тӏадувхача барзкъашца баьдеча хана хоаволийташ белгало хиннаяц. Экспертиза дӏахьош да ӏаьдал из сурт ма дарра меттаоттадара тӏехьа. «Лада Гранта» машин МВД болхлоша ӏочуйигай лаьрххӏача моттиге. РФ УК 3-ча даькъа 264 ст. гӏулакх хьадийллад цу сага духьала, наькъашкара бокъонаш цалархӏарах саг леш хиннача хатара бехкевеш», - дийцар «Сердалога» мехкарча МВД.
Ӏаьдала болхлоша кхайкарал ду машинашца леларашка, велосипедисташ духьала нийсбелча къаьстта чӏоагӏа лоралуш, фийла хила, яхаш. Велосипедаца воагӏа саг гаьннара теркалве веза, наькъашкарча бокъонашца лерхӏам хила!
