Гӏалгӏай мехка дукха ба цӏий дӏалураш
Вай республике ди тӏехьагӏа тӏакхеташ боагӏа цӏий дӏадала кийчабараш. Цар из гӏулакх дара бахьан да, цӏий эшаш барашта новкъостал дар. Карарча шера хьалхарча биъ бетта, республикански цӏий тохача станце дӏаязйир 1,4 эзар цӏий дӏаденна моттиг. Царех 330 духхьашха из дӏалуш хиннаб. Из хоам бир «Сердало» газетага мехка Кулгалхочун, Паччахьалкхен зарбан болх лелабераша.
«Хӏара дӏачуденна цӏий - из вахар кӏалхардаккхара йола таро я. Из наха геттара чӏоагӏа эшаш дола новкъостал да. Дукха нийслу авареш яь, кхыча лазарах могаш боаца нах. Цудухьа донораш а лораш санна чӏоагӏа эшаш ба наха долча новкъостала. Баркал ала безам ба са цӏий дӏадала кийча болча наха, из лоархӏаме гӏулакх да», - аьлар Келаматанаькъан Махьмуд-ӏаьлас, ше тхоца къамаьл деш.
Лораш хӏара денна цӏий хьаэцаш ба. Хала лазараш, цӏийоацар, цӏийца дувзаденна лазар дараш, реанимаце бадараш цӏий дӏадалах тийша ба.
