Юртбоахаме доккхий хувцамаш хиннад Гӏалгӏай мехка
ГӏалгӀайче хьалхарча мугӀарашка йоалаш латт юртбоахама проекташ кхоачашъяра даькъ тӀа, цох дийцар мехка Кулгалхочо Россе Президентага. ЙоккхагӀа йолча гӏишлонех я «Шолже» агрокомплекса цхьанкхетар - лакха технологеш йола къахьегама моттиг, цун мах ба 7,5 млрд сом. Болх бе дӏайолаенначул тӀехьагӀа цо хӀара шера базарашка лоаттабергба 15 эзар тонн совгӏа баьцадаарий кхача, цунца цхьана 300 балха моттиг лургья моттигерча бахархошта.
Жӏайрахьа кхален лоаман моттиге дӀадоладеш да чкъаьрий кхедара гӀулакх. Ӏарамхи оалача хи тӀа хьалъеш я хьалхара «Обанхи» яха моттиг, из лаьрхӀа я форель, семга чкъаьрий леладара. Инвестор хӀанз из хьал дӀахо доаржадеш ва: лоамашка хьалъяьча модулашта тӀехьа, Наьсаре хьалъе лерхӀ тӀехьара тӀа завод. Юкъара дӀалаьрхӀача боахамо 800 тонн чкъаьра кхебергба шера.
