Даьшка-ноаношка дийцар, берий наькъашкарча кхерамзлен хьакъехьа
Укх деношка республике, берригача мехка санна, дӀахьош да наькъа кхерамзлен кӀира. Цунца дувзаденна деша даха ха йоацача берий моттигашка, ишколашка дӀахьош я кхетаченаш. Царех цаӀ хилар Эккажкъонгий-Юртарча №7 йолча ишколе. Наьсарен кхале гӀолла йолча Россе ОМВД ОГИБДД болхлоша цхьана дӀайихьар из кхетаче берий даьшца.
Керттера терко тӀаяхийтар цига гулбеннараша лоархӀамеча моттига, из яр сердал луш дола гӀирсаш, бераш лоралуш йола моттигаш, даьша луш бола хьехам.
Дугенаькъан Рустама белгалдаьккхар, малагӀа лерхӀам ба бераца даьша дувцаш хилара, «цӀа-ишкола-цӀа» яха никъ цаӏ хиларах лаьца. Иштта белагалдир лелае езаш хилар берий барзкъаш тӀа сердал луш йола белгалонаш. Уж барзкъа тӀа, тӀормигаш тӏа хиларо баьдеча бийсан, ара во хаоттам болча хана, новкъостал ду. Цул совгӀа, ГИБДД викало тӀахьийхар берий дай, шоай доалахьарча машенашка берашта лаьрхӀа дола гӀандаш леладара.
«Иштта лерхӀаме да шийгара гойташ дола масал. Оаш гойта деза берашта шоаш мел бехктокхаме да цу дешаца, новкъа лелара хьал лорадарца дувзаденнача.
Диц ма делаш, наькъашка берий кхерамзле хилар - из вай юкъара декхар да. Ишколаша, дезалаша, бокъонаш лораяра болхлоша цхьана къахьегаш хуле мара, таро хургьяц вай берий могашал, вахар лораде», - аьлар Дугенаькъан Рустама.
