«Бӏаьшерий боадонгара» яха спектакль дика тӏаэц мехка
«Бӏаьшерий боадонгара» яха спектакль гойтар Эрсий паччахьалкхен ашарий-драматически театра актёраша. Базорканаькъан Идриса яздаьча романах оттаяь спектакль массахана дукха адам гулдеш хул. Укх наькъа а зал йизза нах бар цунга хьожаш. Аьтинга бетта 30-ча денгара кӏимарса бетта 1-ча денга кхаччалца хилар спектакль.
«Бӏаьшераш хьалха гӏалай юрта баьхача гӏалгӏай вахарера гӏулакхаш, оамалаш, ӏадаташ гойташ къахьийгар актёраша. Хьажархоша тӏоараш детташ, берригаш дог айденна болаш, чакхъяьлар спектакль цу деношка.
Цул совгӏа, театра холле «Тхо наркотикашта духьала да» яха болам бар дӏахьош. Мехкара къонабараш, иштта боккхийбараш а унахцӏена вахара тӏахьехаш, воча, Дала хьарам даьча гӏулакхех юстара хила везилга хьалхадоаккхаш болх бар боаржабаьр. Театре баьхкарашца цу хьакъехьа къамаьл деш бар гӏо деш лелараш, театра болхлой. Белгалде деза, тахан из болх дӏакхахьар мехка чӏоагӏа лоархӏаме долга, хӏана аьлча наркомани яха бӏеха, ийрча гӏулакх къонабарашта юкъе цадаржийтара тӏехьа чӏоагӏа къахьега дезаш да вай дерригаш», - дийцар «Сердалога» театра болхлоша.
Спектаклах лаьца къамаьл дӏахохьош, белгалде лов, Базорканаькъан Идриса яздаьча тайпара из хьагойта хьожаш актёраша чӏоагӏа къахьийгалга. Театра дикагӏа бола актёраш ба цу юкъе дакъа лоацараш. Сцена тӏара артисташ дӏа ца бохийташ, ураэтта тӏоараш детташ, лаьттар зал йизза хинна адам.
