СК тӏахьожама болх дӏаболабир, угарах наха зе далара бахьанаш тохкаш
Гӏалгӏайче гӏолла йолча Тохкама комитето тӏадиллар, угарах наьха могашал йоаяра бахьан тохкаш бола болх дӏабахьар. Хиннар тохкаш я кхалешта юкъера Наьсарен тохкама болх лелабу моттиг. Цу гӏулакхага хьожаш ба Россе УК 1 д. 238 ст. дӏадехарга хьежжа. Ха дезаш да, сага вахара, унахцӏенон кхераме дола хьалаш лоаттадаьдий.
«Хьалххе а ховш болча хоамах, 2026 шера ардара бетта 5-ча дийнахьа Наьсарен кхален Тӏой-Юрта, Гаданаькъан урам тӏа, цӏагӏара газа гӏирс нийса цахиларах, республикан ялх вахархочун могашал йовш, зулам даьлар, цу юкъе пхи бер а долаш. Уж дӏабигар дарбанче, цига эшаш дола лорий новкъостал дир. Карарча хана цар могашала кхераме долаш хӏама дац. Цу моттиге болх беш ба тохкамхой-криминалисташ, хиннар ма дарра довза дагахьа, дӏахо къахьегаш ба говзанчаш», - аьлар «Сердало» газетага Гӏалгӏайчен тохкама комитете.
Цу материалашка хьежжа чаккхе ергья, Россе УПК 145 статьяга хьежжа, лоаццача хана. Тӏахьожама болх дӏабахьар, цун чаккхе йовзар республике гӏолла йолча Россе СК урхаллен тӏахьожаме да.
