Денал долча ДПС инспектора йоагача машина чура саг араваьккхав
Россе МВД «Сунженски» МО Госавтоинспекце ДПС инспектора, полице лейтенанта Тӏумхой Тимур, цхьа секунд ха ца йоаеш, оарцагӏа вера йоагаш латтача машина чура бовра кхерам бола нах арабаха.
«Цу хана балхара цӏагӏа волаш, ший доалахьарча машинаца из воагӏаш вар Шолжа-Шахьара урамах, цунна нийсъелар ши машин вӏашкакхийтта - Mercedes-Benz, Lada Vesta - наькъа хьовзам хинна моттиг. Иномарка йолча машина мотор лотабелар. «Мерседеса» водитель аравала кхоавир машина чура, бакъда цу чу ваьгӏа цхьа саг висар»,- аьлар «Сердало» газетага республикан МВД.
Из маӏа саг веррига цӏийш виза вар, бакъда, хьагучох, хиннар фуд ховш а, е ше унзарча хьале волга кхетадеш а вацар»,- яхаш дийцар Тӏумхой Тимура. Цига тӏехвоалаш хиннача цхьаькха сагаца, иштта полице лейтенанта катеха ниӏ хьа а йийлла, йоагаш латтача машина чура из доарахо араваьккхар, дӏахо уж эттар вай мехка хьаяьча машина чу баьгӏа водитель а цунца хиннараш а арабаха, бакъда уж йохаяьча машина юкъебахабар, царна кӏалхарбоахарий новкъостал, лаьрххӏа дола гӏирсаш ийшар. Цига хьакхаьчача наха шоашта могар дир «Мерседеса» мотор дӏабоабе гӏерташ. Цу хана боккха ала ийккхар, полицейске а тӏехвоалш тӏанийсвеннача сага а юхьмараш, кулгаш доагадир. Тӏабаьхкача цӏераш йоаераша, нах кӏалхарбоахараша новкъостал дир машина чура лозабаь нах арабаха. Хӏанз ДПС инспектора могашал дикагӏа я. Наькъа хьовзам нийсбалара бахьан а, нах кӏалхарбаьхача шоллагӏча сага тайпан цӏи а тохкаш я.
Цу тайпарча моттиге массахана хьалхадоахар да, хӏаманца нийсде йиш йоаца Гӏалгӏайчен мах бар - из цун нах ба, боккъонца денал дола, моллагӏча гӏулакха кийча бола.
