ОМОНа, СОБРа бӏухой турпалал дувцаш, «Zапорожьен турпалаш» яха кино доаккхаш ба мехка
«Zапорожьен турпалаш» яха исбахьален- документальни кино даккха лаьрхӏа, тахан цу гӏулакхага кийчо еш ба вай мехка. Культуран оагӏонцарча гӏулакхех йолча Президентски ганзо, «Коталон гӏо дераш» яхача моттигерча оагӏоно, кагирхой гӏулакхех йолча Комитето хьаллоацаш, дӏахьош ба болх.
«Из кино хургда, 2022-ча шера Запорожски атомни станци лораеш лаьттача Росгварде бӏухой турпалал дувцаш. Вай мехкарча ОМОНа, СОБРа бӏухой хургба цу юкъе дакъа лоацаш. Тӏема геттара лоархӏаме дола декхараш кхоачашдар мишта латт гойташ хургда кино», - дийцар «Сердалога» мехкарча Паччахьалкхен зарбан болх лелабераша.
Сценарецара болх чакхбаьннарг лархӏа мегаргдолаш да тахан. Укх шерарча лайчилла бетта дӏаболалургба кино даккха. Шин моттиге доаккхаргда кино - Запорожски областе, Гӏалгӏайче. Ер шу йистедоалаш киноцара болх чакхбаьккха, монтаж яь баьнна хургба. Даьхенцара безам чӏоагӏбарах йолча кхетаченашка, иштта дешара моттигашка вай къонача тӏехьен гойташ хургда из кино.
