ГӀалгӀай къаман
юкъара газет

Новости


Гӏалгӏай мехка «Деррига Ловзар» яхача баскетбола Кубка яхь чакхйоалаш я

Гӏалгӏай мехка «Деррига Ловзар» яхача  баскетбола Кубка яхь чакхйоалаш я

Лайчилла бетта 28-ча дийнахьа, Гӏалгӏайчен керттерча даькъ тӏа - Йовлой Берда цӏерагӏча спорта Цӏагӏа - «Деррига Ловзар» яхача баскетболах йолча Кубка дешархой тоабашта юкъера тӏеххьара къовсамаш хургада. Спортивни цӏай дӏахьош да «Деррига Ловзар» яха коммерчески доаца цхьанкхетар; дешара, ӏилман Министерство; иштта Гӏалгӏайчен физически культуран, спорта Министерство.

«Сердало» газетага из болх вӏашагӏбеллараша ма аллара, цу яхье гуллургба дикагӏа бола мехка къона баскетболисташ, уж яхьебаргба котало яккхара. Гӏалгӏайчен дешара, ӏилман министра Цхьорой Ахьмад-Башира ма аллара, цу тайпара яхьаш дӏаяхьар кхувш йоагӏача тӏехьен лоархӏаме да.

Цо яхачох, яхьо таро лу дешархошта шоай физически таронаш хьагойта, совгӏаташ дахара къовсаме бала, иштта ӏомабу халонашта духьалъотта. Боахама кулгалхочо аьлар, цу чаккхено дешархошта доккха цӏай дергда, цар дӏахо а безам тӏагӏоргба спортаца дувзаденна гӏулакх дӏадахьа, унахцӏена вахар леладе.

Тӏехьара тӏа уж хьаллоацаш хургда дика совгӏаташ, уж дӏадекъаргда чӏоагӏагӏа йолча тоабашта юкъе. Хьалхъара моттиг яьккхача тоабанна лургда 100 000 сом, шоллагӏа моттиг - 70 000 сом, борза моттиг яьккхарашта 50 000 сом.

Царех дог лаза хьабаьхкача наьха сапаргӏатдаргда. Цига ховш хургда, «Деррига Ловзар» яха Кубок хьанна кхаьчар.

Электронни газета язле

(PDF) кӀира цкъа арадувла къаман юкъара «Сердало» газет, цӀагӀара ара ца воалаш деша таро я

Хьаязде
Вверх