Шолже хилар «Ашарий гуйрен сайре» яха концерт
Шолжа-Шахьара культуран Цӏагӏа «Ашарий гуйрен сайре» яхача концерта программа дӏайихьар. Из вӏашагӏъеллаяр театра, кинон, вай заман хьалий Центро. Цига дукха нах гулбелар: артисташка ладувха баьхкар моттигера бахархой, дешархой, хьехархой.
«Сердало» газетага ЦТКиКИ зарбан болх лелабераша ма аллара, цунна чуйоагӏаш яр тайп-тайпара ашарий оагӏонаш, къаман гӏалгӏай иллешкара дӏайолаенна цӏихезача российски эстрадага кхаччалца. Бокъонца дола совгӏат хилар наха «Силин» яха илли кердадаккхарах, из геттара дезаш тӏаийцар гулбеннараша.
Ший кхоллам цу сайрийна гойтар Эккажанаькъан Маринас, Эккажанаькъан Розас, Оздой Лейлас, Исраиловгӏар Ларисас, Беканаькъан Рахьмана, Беканаькъан Хаде, Габарӏаланаькъан Мадинас, Пхьиленаькъан Ӏаьлас, Ӏарпенаькъан Хьавас, Гаьгенаькъан Ибрахӏима.
Театра, кинон, вай заман тароний Центра кулгалхочо Зортанаькъан Мадинас ма аллара, цу тайпара концерташ дӏадахьаро новкъостал ду кагирхошта шоайла дикагӏа бувзам лелабе, ашарий ӏадаташ довза, цун хозален чам ха.
Белгалду, цу кхетачене баха йиш йолаш бар «Пушкински карта» яхача программага гӏолла, 14 шергара 22 шу даллалца ха яьннараш.