«Цхьана дӏалу вай. ЕГЭ даьшца-ноаношца дӏалу ди» яха болам дӏабихьар вай мехка
Наьсарерча № 6 йолча ишколе дӏабихьар «Цхьана дӏалу вай. ЕГЭ даьшца-ноаношца дӏалуш йола ди» яха болам. Хӏара шера дӏакхухьаш йолча цу кхетачено даьшта, ноаношта бӏаргадайт шоай бераш ЕГЭ дӏаялара гӏулакхах чакхдалар мишта латт. Укх шера цу болама юкъе 50 саг вар, берий цӏагӏарча нахах хьакхийтар цу оагӏонцарча министерствон хьалха латта Цхьорой Ахьмад-Башир, иштта СМИ, юкъарча оагӏонцарча балха доакъашхой.
«Эрсий меттах бола экзамена болх оттабар, дӏахо цу гӏулакхаца мел дувзаденнар мишта хила деза бӏаргадайра царна. Деррига а боаггӏача боараме чакхдалийтара тӏехьа лоархӏаме гӏулакх да ала йиш я цох», - дийцар «Сердалога» дешареи ӏилмани гӏулакхех йолча министерстве.
ЕГЭ дӏаяла езача берашта тӏехьа саготдеш болча даьшта, ноаношта дерригача хӏамах шоаш чакхбаьлча кӏеззига аттагӏа, паргӏатагӏа хет. Цу оагӏонцара болх боаггӏача боараме чакхбалийтара тӏехьа йоккха терко лоаттаю министерствос.
Деррига хӏама ма дарра шоашта бӏаргадайча дег чу баьлла боккха кхерам дӏабоалл даьй-ноаной. Дешархой хьал лорадеш дӏабахьа безарех ба из болх.
