Гӏалгӏай мехка дегӏайоагӏаш я, юкъарча профессиональни дешара оагӏув
ГӏР Паччахьалкхен Председатела Сластенин Владимира республикан паччахьалкхен профессиональни дешара моттигий кулгалхошца кхетаче дӏайихьар, яхаш, дийцар «Сердало» газетага мехка министрий кабинета зарбан болх лелабераша.
«Кхетаче дӏахьош техкар СПО дегӏайоалаяра лоархӏаме дешаш, цу юкъе дар деша хьаэцара кампанега кийчо яр, болхлой кийчбара дикал лакхъяр, балха отта новкъостал дар, иштта тарон-технически кӏийле чӏоагӏъяр. Колледжий кулгалхоша дешара даькъ тӏара хьал дегӏадоаладара шоашта бакъахьа хетар аьлар, уж дӏахо кхоачашдара дола наькъаш а дийцар», - аьлар хоамо.
Колледжий тарон-технически кӏийле яра хаттар республикан ӏаьдало хьалхарчарех лоархӏаш да: кердадоахаш да дешара гӏирсаш, хьакхоллаш я вай заман пхьоалле, болх шаьрбара йола центраш, лакхбу хьехархой профессиональни кийчон боарам, юкъейоалаю практически балхо дӏадехараш чулоацаш йола дешара программаш. Дика болх бара кагирхошта эшар дика дешар да; цул совгӏа, ше деша вагӏача юкъа дӏахо дӏахьоргболча балха говзал йовзар хиланза даргдоацар да.
Дикача толамех цаӏ ба «Кагирхой, бераш» къаман проекта чудоагӏаш; «Профессионалитет» яхача федеральни проекта юкъе дакъа лацар. Дӏадахача шера оагӏой бетта, Ӏарпенаькъан Ю.И. цӏерагӏча Гӏалгӏайчен политехнически колледжа даькъ тӏа, хьайийллар доагора-энергетически комплекса чуйоагӏа дешара-кхоллама оагӏув.
«Тахан вӏашагӏйоллаш я вай заман юкъерча профессиональни дешара кеп, кагирхой таро хургйолаш балха говзал дегӏакхувла, Гӏалгӏайче шоай гӏулакх хьаделла.
Колледжий тарон-технически база кердаяккхар, хьехархой балха говзал лакхъяр тхона лоархӏаме да, хӏана аьлча хьехархой дика хиларах тийша да хургбола говзанчаш кийчбар», - аьлар ГӏР премьер-министра Сластенин Владимира.
