Мехкадаь, Паччахьалкхен зарбан болх лелабераша белгалдечох, хими хержараш эггара дукхагӀа ба- 991 дешархо, цун тӀехьа йоагӀа истори- 590 дешархо, литература - 108 саг. Юкъара болх лелабераша, лораша, Ӏаьдала болхлоша тӀахьожам беш дӀахьоргда из лоархӀаме гӀулакх. Дешареи Ӏилмани гӀулакхех йолча Министерство тӀадилла, хьалххе кийчо яь, деррига боаггӀача боараме дий хьожаш, дӀахьош ба ЕГЭ дӀаялара болх.

«ЕГЭ дика дӀаяла аьттув баргба цу гӀулакха кийчо яьрий, шоай кхетам лакхбеш къахьийгарий. Вуза студенташ хинна кердача наькъ тӀа баьлча, накъадаргда царна тахан шоаш къахьегар, кийчо яр», - белгалдир вай Мехкадас Келаматанаькъан Махьмуд-Ӏаьлас; аьттонца, боаггӀача боараме из гӀулакх чакхдаккха дешархой даькъала бувцаш. 11 моттиг я вай мехка укх шера цу балха кийчяьраш.