ЗаӀапхой долча берашта лаьрхӀа, болам дӀабихьар мехка

«Берал» яхача дегӀа могашал меттаоттаеш гӀо деча Россе моттиге дӀахьожадаьча, ДЦП чулоацаш дола тайп-тайпара лазараш долча берашта лаьрхӀа болам дӀабихьар «ЦаӀ йола Росси» яхача ВПП доакъашхоша. Юкъарлон оагӀонцара гӀо лоаттадеча штабе эшаш дола каьхаташ дӀадала шоай ноаношца, даьшца гулдаьча берашта Госдума депутат волча БӀарахой Бек-ханагара совгӀаташ делар. Планшеташ, планшетацеи телефонацеи болх беча хана лергехйоахкоргаш (наушникаш) йийкъар берашта.
«Берал» яхача дегӀа могашал тоаеча моттиге ха йоаккхаш, дӀадахача шера вай мехкара 52 бер хилар. Укх шера шозза дукхагӀа хургда уж. 18 беро укх бетта дӀадоладергда дарба, саькура бетта кхы а дукхагӀа гӀоргба. Укх шера цига ха яккха езараш дерригаш а 100 бер да вай республикера.
«Теша лов, вай берашта цига яьккха ха дикка пайда беш, дегӀа могашал меттаоттаеш хургхиларах. Сабар, низ ма эшалба могаш доацача берашта, цар цӀагӀарча наха»,- аьлар единороссаша.