Пунчена духьала маьхий тохаш, болх ба мехка дӏаболабаь
Гуйран ха хьаоттарца, пунчена духьала маьхий тоха болх дӏаболабу вай мехка. Иштта къаман ханоргаца чӏоагӏъяь латта хан-ханнахьа е еза «прививкаш» е дӏаболалу республике. Полиомиелит яхача лазара, иштта кхыдарашта духьала маьхий тохаш бола болх бизза чакхбаккха хьожаш ба тахан.
«Укх шера 95% - га кхоачаш чакхбаккха лерхӏ из болх мехка, къаьстта чӏоагӏа терко еш. Бахархошта аттагӏа хургдолаш, 30 унахцӏенон оагӏонцарча доазонаш тӏа болх дӏахьош хургба маьхий тохара болам.
Амбулоторешка маьхий детта кабинеташ болх беш я тахан, эшаш мел бола кхоачам а болаш ба. Маха тохалехь хӏара берага хьожаш, дегӏа хьал теркалдеш ба лораш», - дийцар «Сердалога» мехкарча цу оагӏонцарча министерствос.
Наьсарерча поликлиникаца дӏаязвеннараш 30 эзар совгӏа бераш да. Хӏара шинара, пӏаьраска деношка, цу балхаца дувзаденнараш довза йиш йолаш, берий ноаношца дӏахьош болх ба цига. Маьхий тохарах тахан даьржа дола кхераме къамаьлаш бух боацаш долга, маьхий тохар – шоай бера унахцӏенон уйла яр долга белгалдергда лораша. Моллагӏа цу оагӏонцара хаттар дашха йиш я ноаной цу деношка.
