«Дошо гӏала» яхача XII-ча кинофестивале, дехараш чуийде болалуш ба мехка
«Дошо Гӏала» яхача Халкъашта юкъерча XII кинофестивале дакъа лоацарашкара, дехараш чуэцаш болх дӏаболабаьб мехка. Дикка цӏихеза йола фестиваль культуран гӏулакхех йолча моттигерча министерствос, Россе кинематографистий Союзо хьаллоацаш дӏахьоргья. Ардара бетта 25-ча денгара 28-ча денга кхаччалца боаржабергба из болх вай мехка.
«Яхьашка геттара чӏоагӏа лоархӏаш хургда Сийлахь-боккхача Даьймехка тӏема шерашкара таханарча денга кхаччалца йолча хана бовзаш болча наьха турпалалах, тӏема моттигашка гойтача деналах, майралах дола кинош. Яхьий программан юкъе да ловзара, документальни, анимационни российски, иштта доазол арахьарча кинематографистий кинош. 2023-ча шерал тӏехьагӏа даьха кинош да яхьашта юкъедолхараш. Гӏалгӏайчен шахьарий итт совгӏа долча кинодоазошка хьокхаргда кинош. Хьажархошта гургда российски, иштта доазол арахьарча говзанчаша даьха кинош, хӏаьта доакъашхоша дуккхача адама, кхелахошта гойтаргда шоаш даьхараш», - йоах «Сердалога» кинофестивала хьалха латтарашкара бенача хоамо.
Ийс оагӏонца хоржам беш хургба кхелахой, хӏаьта гран-при эггара толашагӏа ба аьнна къоастабаьча балха кхоачаргья.
Маьцхали бетта 25-ча денгара ардара бетта 10-ча денга кхаччалца чудала йиш я дехар, дакъа лаца ловш волчо. Кинолентай хӏама къоастадергда массехк оагӏонца: «Толашагӏа дола полнометражини ловзара кино», «Толашагӏа дола лоаца кино», «Толашагӏа дола документальни кино», «Толашагӏа дола Къилбаседа Кавказа кино», «Толашагӏа дола гӏалгӏай кино», «Толашагӏа дола анимационни кино», «Толашагӏа бола режиссёра болх», «Толашагӏа йола маӏача сага юхь», «Толашагӏа йола кхалсага юхь».
