Тӏа да воаца йиӏиг кхоабаш ягӏарах дола пенси хьадоладелар
Гӏалгӏайчен сага бокъонех викал волча ера Наьсаре яхаш йола кхалсаг, ший йоӏа доагӏаш дола пенси соцадарах лоткъам бахьаш. Цо аьлар, 18 шу даьлча, ший йоӏа хьадоагӏаш хинна пенси соцадаьд. Из очно дешаш хилара каьхаташ ший ханнахьа дӏаденна дале а, пенси кхы хьадоладаьдац, е из соцадара бахьан малагӏа да а ховш дац.
«Сага бокъонех волча викала, цу кхалсага оагӏув хьаллоацаш, лаьрххӏа бола хоам бир Россе Вахара ганзага. Цу гӏулакха тӏа къахьегарах гучадаьлар, каьхаташ гӏалат долаш хилар: из деша ягӏа моттиг малагӏа я белгалъяьяц. Ганза болхлоша дешара моттиге из къоастадара дӏадахьийта хинна хаттар дукхача хана денз жоп доацаш дисар», - аьлар «Сердало» газетага ГӏР УПЧ хоамий отделе.
Бокъонаш лораер юкъеварах, тӏа да цахиларах доагӏаш дола пенси йиӏига хьадоладир, из соцадаьча хана денз, 2025 шера товбетта 28-ча денгара 2026 шера маьтсела бетта 31-ча денга кхаччалца мел доагӏар а а хьаделар.
