Сим-карта харцахьа дIаяздарах, судо кхел йир ГIалгIай мехка
Гӏалгӏайчен Магӏалбик-Шахьара суде техкар моттигерча вахархочунна духьалара уголовни гӏулакх. Из бехке ву РФ УК 3 д. 272 (ше балха хилар хьал юкъе а даьккха, законо лораеча компьютер чура хоамаш цо леладарах).
Республикан Прокуратуре «Сердало» газетага ма аллара, судо чӏоагӏдир, 2025 шера Магӏалбик-Шахьара сотовый бувзама цхьан салоне балха волаш, план кхоачашъяьй аьнна преми эцара, сим-карта юкъе а даьккха, цо зулам даь хилар.
Цу гӏулакха цо леладаьд кхыча сага паспорта хоамаш. Цу тайпара законах лораеш йолча компьютер чу ше-ше уж хувцамаш юкъедаьлар, бувзама оператора хоамий даькъ тӏа уж гуш хилар.
Цун зӏамига бер хилар дӏа а лоархӏаш, судо цхьан шера цун кортамукъале ехкаш ха техар. Цул совгӏа, цунгара цо зулам леладаь телефон а хьаяьккхар.
