Ший 90 шу дизар дезду цӏихезача гӏишлонхочо Марзбиканаькъан Азамата
Гӏалгӏайчен цӏихезача гӏишлонхочун, технически ӏилмай кандидата, СССРа ВДНХ дото майдилг еннача Марзбиканаькъан Азраила Азамата 90 шу дизад. Из йоккха юбилей - вахара йӏаьха зама я, цун ший хинна а ца ӏеш, республикан дерригача гӏишлонхой исторе.
Паччахьалкхен председатела Сластенин Владимира тӏадиллача декхарах, гӏишлонхо даькъалавийцар министра Иленаькъан Мусас, министра гӏончас Евкуранаькъан Мухьмада.
Хьаьшаша дӏаделар Азраила Азаматага моаршал хоатташ дола каьхат, из даькъалавийцар цун яьннача ханаца. Республикан архитектура дегӏайоалаеча цо доккха дакъа юкъедарах, дукхача шерашка хьинаре къахьегаш хьаварах, баркал аьлар.
Марзбиканаькъан Азамат заман саг ва. Дукхача шерашка кулгал деш дола балхаш леладир цо, гӏишлон даькъ тӏа. Цун професси накъаяьлар мехка гӏишлошъяр дегӏадоаладеча. Из ва начӏал дола, дика кулгалхо. Цо даим юкъейоахар хьалхале лелаю технологеш. Цунна карагӏдаьнначох доаккхал а деш, лакха мах оттабир берригача мехка боарам тӏа - СССРа ВДНХ лоархӏаме дото майдилг луш.
Къонача говзанчашта, хӏанзарча гӏишлонхошта, Марзбиканаькъан Азамат дика масал да.
«Сердало» газета редакце дег чура даькъалавувц Азраила Азамат ваьча денца: могаш, хьинар долаш, дега паргӏато йолаш; вахалва хьо.
