Мехка вахархочунгара машин дӏаяьккхар ӏаьдало
10.02.2026 11:00
Каьхаташ доацаш машин хехкаш лийннача Шолжа-Шахьарерча вахархочунгара машин дӏаяьккхар ӏаьдала болхлоша. Из хоам «Сердалога» бир Прокуратуре.
«Шолжа кхален судо белгалдечох, 2025-ча шера аьтинга бетта каьхаташ доацаш «ВАЗ- 210740» машинаца араваьннав из саг. Белгалде деза, ишттача хьале волаш из хьалхагӏа а соцаваь хиннилга.
Россе МВД ДПС ОГИБДД «Шолжа кхала» МО болхлоша «Ангара -122» яхача посте машин хьаяьккхар цу сагагара. 200 сахьата ӏаьдала болх бе оттавир из, цул совгӏа цхьан шера машинаца лела йиш йоацаш бокъо йийхкар, машин ӏаьдала ганзе дӏачуяхай.
